សមាគមសារព័ត៌មាន ត្រូវមានក្រមសីលធម៌ដូចតទៅ ៖
• គោរពសច្ចធម៌ និងគោរពសិទ្ធិយល់ដឹងរបស់សាធារណជន
• ត្រូវផ្សព្វផ្សាយដំណឹងទាំងឡាយដោយសុចរិត ព្រមទាំងធ្វើ អត្ថាធិប្បាយ ឬរិះគន់ឱ្យបានត្រឹមត្រូវ និងស្របតាមគតិយុត្តិ
• ត្រូវរាយការណ៍ពីអ្វីដែលខ្លួនបានដឹងពីប្រភពដើមតែប៉ុណ្ណោះ។ អ្នកសារព័ត៌មាន មិនត្រូវបំបាត់ចោលព័ត៌មានសំខាន់ៗ ឬក្លែងបន្លំឯកសារផ្សេងៗឡើយ
• ត្រូវកែលម្អព័ត៌មានណាដែលមានលក្ខណៈមិនជាក់លាក់ ឬអាចបណ្ដាលឱ្យភ័ន្តច្រឡំ
• ប្រើវិធីសុចរិតត្រឹមត្រូវ កុំស្វែងរកព័ត៌មានណាដែលញុះញង់ឱ្យមានការប្រកាន់ពូជសាសន៍ ពណ៌សម្បុរ ភេទ ភាសា ជំនឿ សាសនា មតិ ឬនិន្នាការនយោបាយ ដើមកំណើត ឋានៈសង្គម ធនធាន ឬស្ថានភាពដទៃទៀត
• ត្រូវគោរពសិទ្ធិ និងសេរីភាពរស់នៅក្នុងជីវភាពឯកជនរបស់បុគ្គល
• ត្រូវគោរពក្បួនវេយ្យាករណ៍ខ្មែរក្នុងការសរសេរអត្ថបទ
• ហាមបោះពុម្ពផ្សាយអត្ថបទ រូបភាពអាសអាភាស និងរូបភាពនៃអំពើហិង្សា
• ហាមលួចចម្លងគំនិត ឬស្នាដៃអ្នកដទៃ ដាក់ជារបស់ខ្លួន
• ហាមសរសេរបន្លំធ្វើឱ្យគេយល់ខុសដូចជាសរសេរបញ្ឆិតបញ្ឆៀងដើម្បីឱ្យអ្នកអានមានការសង្ស័យដោយអយុត្តិធម៌លើបុគ្គលណាម្នាក់
• ហាមមួលបង្កាច់ បរិហារកេរ្តិ៍និងជេរប្រមាថដល់បុគ្គលឬគណបក្ស
• ហាមទទួលយកសំណូកក្នុងបែបណាមួយឬជំរិតទារយកប្រាក់។

ព័ត៌មានដែលពុំគួរចុះផ្សាយ គឺព័ត៌មានដែលនាំឱ្យ ៖
• អន្តរាយដល់សន្តិសុខជាតិ។
• អន្តរាយដល់ទំនាក់ទំនងជាមួយប្រទេសដទៃ។
• មានការរំលោភបំពានសិទ្ធិបុគ្គលម្នាក់ៗ ដោយរាប់ទាំងសំណុំរឿងមន្ត្រីរាជការ សំណុំរឿងនយោបាយ និងឯកសារសម្ងាត់របស់ជាតិជាដើម។
• មានការលាតត្រដាងឯកសារសម្ងាត់ផ្នែកពាណិជ្ជកម្ម ផ្នែកហិរញ្ញវត្ថុរបស់បុគ្គល ឬអង្គភាពចំណាយ និងលាតត្រដាងពីបទបញ្ជាឬការត្រួតពិនិត្យរបស់ស្ថាប័នហិរញ្ញវត្ថុ។
• ប៉ះពាល់ដល់សិទ្ធិជនណាម្នាក់ ដែលនាំឱ្យមានការជំនុំជម្រះក្ដីដោយអយុត្តិធម៌។
• មានគ្រោះថ្នាក់ដល់មន្ត្រីដែលអនុវត្តច្បាប់ ឬត្រូវបំពេញបេសកកម្មរបស់ខ្លួន។

• អ្នកសារព័ត៌មាន ត្រូវមានការប្រុងប្រយ័ត្ន ចៀសវាងការសរសេរដែលធ្វើឱ្យប៉ះពាល់ការបរិហាកេរ្តិ៍ដល់អ្នកដទៃដែលពុំមានប្រភពច្បាស់លាស់។ ព័ត៌មានដែលគ្មានប្រភពច្បាស់លាស់ និងគ្មានភ័ស្តុតាងត្រឹមត្រូវ នឹងធ្វើឱ្យប៉ះពាល់ដល់ប្រពៃណីល្អរបស់សង្គម ស្ថាប័នជាតិ ឬញុះញង់ឱ្យមានកើតអំពើហិង្សា នឹងត្រូវមានទោសតាមច្បាប់ ជាធរមាន។

• ការបញ្ចេញព័ត៌មាន ត្រូវមានលក្ខណៈច្បាស់លាស់ មានតម្លាភាព និយាយការពិត មិនភូតភរ ឬបោកបញ្ឆោត ដល់សារធារណជនឡើយ។ សារព័ត៌មាន ត្រូវផ្សព្វផ្សាយទៀងទាត់ ពេលវេលា និងបម្រើផលប្រយោជន៍ដល់ប្រជាជនទូទៅ និងមិនបម្រើផលប្រយោជន៍គណបក្សនយោបាយណាមួយឡើយ។

• អ្នកសារព័ត៌មាន គឺជាអ្នកនាំពាក្យពីប្រជាជនទៅរដ្ឋាភិបាល និងពីរដ្ឋាភិបាលទៅប្រជាជនវិញតាមរយៈសារព័ត៌មាន វិទ្យុ ទូរទស្សន៍ ទស្សនាវដ្ដី សារអេឡិចត្រូនិច (អ៊ិនធឺណែត)…។