អ្នកដឹកនាំល្អ និងមានប្រសិទ្ធភាពលើការងារ ត្រូវមានគោលការណ៍ដូចតទៅ ៖
• ស្រឡាញ់សមាជិកអង្គភាពទាំងមូល រួមទាំងអ្នកជំនាញ បច្ចេកទេស និងអ្នកនៅក្រោមឱវាទឱ្យបានត្រឹមត្រូវគ្មានលម្អៀង។
• ត្រូវពិនិត្យនិងទទួលខុសត្រូវលើផែនការរបស់ខ្លួនដែលបានដាក់ចុះ ហើយអនុវត្តជាជំហានៗរហូតដល់ទីបញ្ចប់នៃផែនការ។
• ត្រូវទទួលខុសត្រូវចំពោះឥរិយាបថរបស់ខ្លួន ដោយប្រាកដថា តើការសម្រេចចិត្តមានលក្ខណៈសមស្រប និងមានការពេញចិត្តពីថ្នាក់ក្រោមតាមរយៈការប្រជុំពិភាក្សា ការឯកភាពពីអ្នកគ្រប់គ្រងក្រោមឱវាទគ្រប់ជាន់ថ្នាក់ដែរឬទេ ?
• ជួយសមាជិក ឬក្រុមណាដែលខ្សោយ និងប្រគល់សិទ្ធិចាត់ចែងការងារចំពោះក្រុម ឬបុគ្គលណាដែលមានសមត្ថភាព។
• ជំរុញឱ្យមានការផ្លាស់ប្ដូរគំនិតយោបល់គ្នា និងបទពិសោធល្អៗដែលអាចឱ្យក្រុមផ្សេងៗទៀតយកធ្វើជាគំរូ ប៉ុន្តែត្រូវមានការផ្សព្វផ្សាយគំនិតថ្មីឱ្យសមាជិកទាំងអស់យល់សិន ទើបអាចផ្លាស់ប្ដូរបាន។
• ណែនាំតម្រង់ជាបន្ទាន់ ប្រសិនបើឃើញក្រុមណាមួយ ពុំយល់ច្បាស់ពីការធ្វើសកម្មភាពនិងទិសដៅរបស់អង្គភាព។ល។

• មុខងារត្រួតពិនិត្យ ពាក់ព័ន្ធនឹងការវាយតម្លៃ វិនិច្ឆ័យលើការងារ និងលើលទ្ធផលដែលបានអនុវត្ត ហើយប្រៀបធៀបនឹងផែនការដែលបានកំណត់។

• មុខងារដឹកនាំបង្ហាញឱ្យឃើញពីសមត្ថភាពអ្នកដឹកនាំចូលរួមផ្ទាល់ ជំរុញការងារណែនាំសកម្មភាពអ្នកនៅក្រោមបង្គាប់ ឱ្យធ្វើតាមគោលដៅដែលបានកំណត់ដោយឈរលើស្មារតីទទួលខុសត្រូវផ្នែកសីលធម៌ និងវិន័យការងារ។

• ការដឹកនាំផ្ដាច់ការ ជាការដឹកនាំដែលមានទម្រង់ជាបុគ្គលនិយម អត្តនោម័ត មិនផ្ដល់ឱកាសឱ្យសមាជិកបញ្ចេញយោបល់ និងគំនិតផ្ដួចផ្ដើមឡើយ។ រាល់ផែនការដឹកនាំទាំងអស់ អ្នកដឹកនាំជាអ្នកបង្កើតផែនការនិងធ្វើការសម្រេចចិត្តដោយខ្លួនឯង។ អំណាចប្រមូលផ្ដុំទៅលើស្ថាប័ន ឬបុគ្គលម្នាក់។ អ្នកដឹកនាំបែបនេះច្រើនបន្តចេញពីត្រកូលមួយទៅត្រកូលមួយទៀត ឬផ្ដើមចេញពីការដណ្ដើមអំណាចដោយប្រើកម្លាំងយោធា។