ក្នុងអាណត្តិទី៤ គោលដៅជាអាទិភាពនៃគោលនយោបាយសេដ្ឋកិច្ច កាត់បន្ថយភាពក្រីក្រ ផ្ដោតលើវិស័យ អាទិភាព១០ គឺ ៖
• កសិកម្ម
• ទឹក និងប្រព័ន្ធស្រោចស្រព
• ហេដ្ឋារចនាសម្ព័ន្ធដឹកជញ្ជូន
• អគ្គិសនី
• ការអភិវឌ្ឍធនធានមនុស្ស
• ឧស្សាហកម្ម និងឧស្សាហកម្មទំនិញនាំចេញ
• ទេសចរណ៍
• អាជីវកម្មប្រេងកាត ឧស្ម័នធម្មជាតិ និងធនធានរ៉ែផ្សេងទៀត
• ព័ត៌មានវិទ្យា និងទូរគមនាគមន៍
• ពាណិជ្ជកម្ម។

អភិបាលខេត្ត-រាជធានី មានតួនាទី និងភារកិច្ចដូចខាងក្រោម ៖
• ទទួលខុសត្រូវការងាររដ្ឋបាល និងគោលនយោបាយរបស់រាជរដ្ឋាភិបាលដែលបានប្រគល់ឱ្យ។
• ត្រួតពិនិត្យមន្ត្រីរាជការទាំងខ្សែរយៈបណ្ដោយ ទាំងខ្សែរយៈទទឹង ដែលកំពុងមានភារកិច្ចលើមុខជំនាញនានារបស់រដ្ឋក្នុងខេត្ត-រាជធានីរបស់ខ្លួន លើកលែងតែជំនាញឯកទេស តុលាការ ប៉ុណ្ណោះ។
• ទទួលខុសត្រូវលើការគ្រប់គ្រងប្រជាជន ទ្រព្យសម្បត្តិសាធារណៈ ការការពារសណ្ដាប់ធ្នាប់ សន្តិសុខសង្គម និងវិស័យអភិវឌ្ឍន៍ដែលពាក់ព័ន្ធនឹងជីវភាពរស់នៅរបស់ប្រជាពលរដ្ឋក្នុងខេត្ត-រាជធានី ដែលខ្លួនគ្រប់គ្រង។
• ទទួលខុសត្រូវ និងតាមដានផែនការសកម្មភាពអភិវឌ្ឍន៍របស់ក្រុង ស្រុក/ខណ្ឌ ធៀបទៅនឹងផែនការមេរបស់ខេត្ត-រាជធានី។
• ចូលរួមដោះស្រាយរាល់ទំនាស់ដែលមានលក្ខណៈជារដ្ឋបាល ចាត់តាំងអនុវត្ត ត្រួតពិនិត្យនិងដោះស្រាយតាមនីតិវិធី។
• អភិបាលខេត្ត-រាជធានី ពុំមានសិទ្ធិជ្រៀតជ្រែកទៅលើកិច្ចការតុលាការខេត្ត-រាជធានីឡើយ តាមមាត្រា ១៣០ថ្មី របស់រដ្ឋធម្មនុញ្ញ នៃព្រះរាជាណាចក្រកម្ពុជា។

បង្ហាញពីផែនការយុទ្ធសាស្ត្រនិងសកម្មភាពសង្កាត់មួយ ដោយផ្ដោតលើទិសដៅផ្នែកសេដ្ឋកិច្ច ៖
• យុទ្ធសាស្ត្រ ៖ កែលម្អផ្លូវនៅក្នុងសង្កាត់ រៀបចំដាក់លូខ្នាតធំ បង្ហូរទឹកស្អុយ កែលម្អផ្លូវ ស្ពាន និងបង្កើនចំណូល គ្រួសារ។
• សកម្មភាព ៖ ដាក់លូខ្នាតធំបង្កប់ ជួសជុលផ្លូវធំ ជួសជុលផ្លូវក្រួសក្រហម ជួសជុលស្ពាន ចាក់បេតុងច្រកផ្លូវតូចៗ ផ្ដល់ឥណទានសម្រាប់គ្រួសារក្រីក្រដើម្បីប្រកបមុខរបរ ផ្ដល់ឥណទានជាសាច់ប្រាក់។

• ដើម្បីដឹកនាំភូមិ ឃុំ បានល្អ ក្រុមប្រឹក្សាឃុំ- សង្កាត់ ត្រូវមានផែនការគោលរបស់ខ្លួន ក្នុងគោលបំណងបង្ហាញគោលដៅអភិវឌ្ឍន៍ និងឆ្លើយតបទៅនឹងសេចក្ដីត្រូវការរបស់សហគមន៍ មូលដ្ឋាន ជាពិសេស ផ្ដល់ឱកាសឱ្យប្រជាពលរដ្ឋចូលរួមស្ដាប់ ផ្ដល់អនុសាសន៍ដល់សេចក្ដីសម្រេចរបស់ក្រុមប្រឹក្សា ផ្ដល់ការគាំទ្រជួយកែលម្អស្ថានភាព ជីវភាពរស់នៅរបស់ប្រជាពលរដ្ឋនៅក្នុងឃុំ-សង្កាត់។