ដើម្បីឱ្យអាពាហ៍ពិពាហ៍ប្រព្រឹត្តទៅតាមផ្លូវច្បាប់គូស្រករទាំងពីរត្រូវទៅចុះកិច្ចសន្យាអាពាហ៍ពិពាហ៍នៅមុខមន្ត្រីអត្រានុកូលដ្ឋាននៅគេដ្ឋានខាងស្រី ។

បុរសនិងស្រ្តីមុននឹងឈានទៅដល់ការរៀបអាពាហ៍ពិពាហ៍ គេគួរតែគោរពតាមលក្ខខណ្ឌដូចតទៅ ៖ ក. លក្ខខណ្ឌសម្ភារៈ • ត្រូវមានទ្រព្យសម្បត្តិ ធនធាន • ត្រូវមានសុខភាពល្អ គ្មានជំងឺឆ្លងផ្សេងៗ ឬជំងឺសូពូជ • ត្រូវមានចំណេះដឹង សមត្ថភាពវិជ្ជាជីវៈ • មានមុខរបរ អាជីវកម្ម ឬការងារផ្សេងៗ • ត្រូវមានទីជំរកត្រឹមត្រូវ ខ. លក្ខខណ្ឌវេទនា ឬសញ្ចេតនា • ត្រូវស្គាល់ចិត្តគ្នាទៅវិញទៅមក ចេះស្រឡាញ់គ្នាទៅវិញទៅមក • គ្មានការបង្ខិតបង្ខំ ពីឪពុកម្តាយ ឬបង្ខំគ្នាទៅវិញទៅមក • មានសេរីភាពពេញលេញក្នុងការជ្រើសរើសដៃគូជីវិត

លក្ខខណ្ឌដែលបុរស និងស្រ្តីមិនអាចរៀបអាពាហ៍ពិពាហ៍បានមាន ៖ • បុគ្គលមានភេទដូចគ្នា • បុគ្គលគ្មានពលានុភាពនៃលិង្គ • បុគ្គលមានជំងឺឃ្លង់ របេង មហារីកកាមរោគ ដែលមិនទាន់ព្យាបាលជាដាច់ ជាពិសេសជម្ងឺមហារីក និងជម្ងីអេដស៍ • ជនវិកលចរិត ឬជនមិនដឹងខុសត្រូវ • បុគ្គលមានចំណងអាពាហ៍ពិពាហ៍ពីមុន • បុគ្គលដែលជាប់ចំណងញាតិពន្ធលោហិត ឬញាតិពន្ធក្នុងខ្សែផ្ទាល់គ្រប់ថ្នាក់ ទោះជាចំណងទាំងនោះមានខាន់ស្លាក្តី ឥតខាន់ស្លាក្តី ឬសាច់ចិញ្ចឹមក្តី • បុគ្គលមានចំណងអាពា៍ពិពាហ៍ពីមុនមិនទាន់រំលាយ ។

ដើម្បីឱ្យអាពាហ៍ពិពាហ៍ពលរដ្ឋកម្ពុជានិងជនបរទេសប្រព្រឹត្តទៅតាមផ្លូវច្បាប់គេត្រូវប្រព្រឹត្តទៅចំពោះមុខមន្ត្រីអត្រានុកូលដ្ឋាននៃស្ថានទូត នៃប្រទេសទាំងពីរ ។

ចំណងអាពាហ៍ពិពាហ៍ត្រូវរលាយក្នុងករណីណាមួយដូចខាងក្រោម ៖ • សហពទ្ធ័ណាមួយស្លាប់ • មានសេចក្តីសម្រេចរំលោយចំណងអាពាហ៍ពិពាហ៍ជាស្ថាពររបស់តុលាការ • សហពទ្ធ័ណាម្នាក់បាត់ខ្លួនហួសពីឆ្នាំដោយគ្មានដំណឹងអ្វីសោះមិនដឹងថាស្លាប់ ឬរស់ ។

ដែលហៅថាចំណងអាពាហ៍ពិពាហ៍ គឺជាកិច្ចសន្យាដ៏ឩឡារីកមួយធ្វើឡើងដោយបុរសម្នាក់ និងស្រ្តីម្នាក់ដែលប្តេជ្ញាថារួមសមគ្គសង្វាសជាមួយគ្នាតាមបញ្ញត្តិច្បាប់ ហើយដែលមិនអាចរំលាយទៅវិញ បានតាមទំនើងចិត្តរបស់ខ្លួន ។

អានុភាពនៃការលែងលះ ៖ • ក្នុងការលែងលះនេះ ទ្រព្យសម្បត្តិត្រូវបែងចែកទៅតាម ការព្រមព្រៀងនៃភាគីទាំងសងខាង ។ បើគ្មានការព្រមព្រៀងសហព័ទ្ធម្នាក់ៗត្រូវយកតែទ្រព្យសម្បត្តិផ្ទាល់របស់ខ្លួនដែលមានមុនពេលរៀបការ និងទ្រព្យសម្បត្តិដែលខ្លួនបានទទួលជាមរតកក្តីជា អំណោយក្តីក្នុងរយៈពេលមានចំណងអាពាហ៍ពិពាហ៍ប៉ុណ្ណោះ ។ ក្រៅពីនេះសហព័ទ្ធ ម្នាក់ៗមានសិទ្ធិត្រូវបានទ្រព្យសម្បត្តិរួមពាក់កណ្តាលម្នាក់លើកលែងករណីពិសេស និងតាមសំណើរបស់សហព័ទ្ធណាមួយតុលាការអាចសម្រេចចែកទ្រព្យសម្បត្តិរួមផ្សេងពីគោលការណ៍ខាងលើបានដោយគិតទៅដល់ផលប្រយោជន៍របស់កូន និងផលិតកម្ម ។ • អំណាចមេបាត្រូវប្រគល់ទៅឪពុក ឬទៅម្តាយ និងការប្រាស្រ័យទាក់ទងរវាងឪពុកម្តាយ និងកូនផង ។ ឯការរក្សាកូនត្រូវសម្រេចតាមការយល់ព្រមនៃប្តី ប្រពន្ធដែលលែងលះគ្នា ។ តាមគោលការណ៍កូនដែលនៅបៅដោះត្រូវឱ្យ ទៅម្តាយរក្សា ...

មូលហេតុនៃការលែងលះគ្នាមានជាអាទិ៍គឺ ៖ • ការចុះចោលលំនៅសង្វាសដោយឥតមូលហេតុត្រឹមត្រូវហើយឥតមានផ្គត់ផ្គង់ស្បៀងអាហារនិងទំនុកបម្រុងគ្រួសារ • វាយដំឃោរឃៅធ្វើទុក្ខបុកម្នេញប្រមាថមើលងាយធ្ងន់ធ្ងរចំពោះសហព័ទ្ធឬចំពោះបុព្វញាតិរបស់សហព័ទ្ធ • មានចរិតផ្ទុយពីសីលធម៌ឬប្រព្រឹត្តអនាចារ • អពលានុភាពនៃលឹង្គ • បែកគ្នាអស់រយៈពេលជាងមួយឆ្នាំ ។

នីតិវិធីនៃការលែងលះការសម្រេចអំពីការលែងលះគ្នា • ការសម្រេចអំពីការលែងលះគ្នាជាសមត្ថកិច្ចរបស់តុលាការខេត្ត ក្រុងខាងលំនៅរបស់ចុងចម្លើយបន្ទាប់ពីការផ្សះផ្សាររបស់អាជ្ញាធរដែនដីឃុំ សង្កាត់និងការព្យាយាមផ្សះផ្សាសម្រុះសម្រួលរបស់តុលាការខេត្ត ក្រុងចំនួនបីលើកមិនបានសម្រេច ។ • ក្រុមប្រឹក្សាឃុំ សង្កាត់ត្រូវធ្វើការផ្សះផ្សាក្នុងរយៈពេល១៥ថ្ងៃក្រោយពីទទួលពាក្យបណ្តឹងនិងបញ្ជូនសំណុំរឿងបន្ទាន់ទៅតុលាការខេត្ត ក្រុងបើផ្សះផ្សាពុំបានសម្រេច ។ ឯការផ្សះផ្សាម្តងៗរបស់តុលាការត្រូវឱ្យឃ្លាតពីគ្នាមួយខែយ៉ាងឆាប់ និងពីរខែយ៉ាងយូរ • បើប្រពន្ធមានផ្ទៃពោះប្តីអាចនឹងសុំប្តឹងលែងលះបានលុះត្រាតែប្រពន្ធនោះសម្រាលកូនរួចបានមួយឆ្នាំសិន ។ តែការបន្ថយសិទ្ធិនេះមិនត្រូវអនុវត្តលើនារីទេ ។

អាយុរៀបការស្របច្បាប់របស់បុរសចាប់ពីអាយុ ២០ ឆ្នាំ យ៉ាងតិច រីឯនារីចាប់ពីអាយុ ១៨ឆ្នាំ យ៉ាងតិច ។ អាយុក្រោមពីនេះបុរសស្រ្តីក៏អាចរៀបការបានតែក្នុងករណីភាគីខាងស្រីមានផ្ទៃពោះហើយមានការយល់ព្រមពីមាតាបិតាឬអាណាព្យាបាល ។