សកម្មភាពដោយឆន្ទ:(ញាណ)មានការសម្របសម្រួលចលនាសាច់ដុំ ដូចជា ការជិះកង់ ការរាំ ការច្រៀង…។ល។សកម្មភាពដោយអឆន្ទ:(អញាណ)មានការត្រួតពិនិត្យសកម្មភាពរបស់សរីរាង្គនៃសារពាង្គកាយដូចជា ការកន្រ្តាក់នៃបេះដូង ការដកដង្ហើម ការរំលាយអាហារ…។ល។

អាំងភ្លុចប្រសាទអាចឆ្លងកាត់ស៊ីណាប់បានដោយសារ ក្នុងស្ញាញអាក់សូនមានពពុះតូចៗជាច្រើន ដែលផ្ទុកសារធាតុគីមី។ នៅពេលអាំងភ្លុចប្រសាទទៅដល់ស្ញាញអាក់-សូន ពពុះតូចៗក៏ផ្ទុះបែក ហើយបញ្ចេញសារធាតុគីមីដែលសាយឆ្លងកាត់ស៊ីណាប់។ នៅផ្នែកស្ញាញអាក់សូនម្ខាងទៀត សារធាតុគីមីនេះបង្កើតអាំងភ្លុចប្រសាទថ្មីមួយទៀតនៅក្នុងដង់ឌ្រីតនៃណឺរ៉ូនក្បែរនោះ។តាមលំនាំនេះ អាំងភ្លុចប្រសាទធ្វើចលនាឆ្លងកាត់ពីណឺរ៉ូនមួយទៅណឺរ៉ូនមួយផ្សេងទៀត។

អាំងភ្លុចប្រសាទធ្វើដំណើរតាមដង់ឌ្រីតទៅកាន់តួកោសិកា។ ចេញពីតួកោសិកា អាំងភ្លុចប្រសាទធ្វើដំណើរតាមអាក់សូនឆ្ពោះទៅកាន់ណឺរ៉ូនក្បែរគ្នាក្នុងច្រវាក់តែមួយ។ អាំងភ្លុចប្រសាទ ធ្វើចលនាយឺតៗជាងចរន្តអគ្គិសនី។ វាធ្វើចលនាតាមបណ្ដោយអាក់សូនក្នុងល្បឿនប្រហែល120m ក្នុងមួយវិនាទី។

នៅក្នុងខួរក្បាល ណឺរ៉ូនភ្ជាប់បង្កើតបានតំណដែលអាចបញ្ជូនព័ត៌មានរវាងផ្នែកផ្សេងៗនៃខួរក្បាល។ ក្នុងសារពាង្គកាយវាមានប្រហែល 97% នៃណឺរ៉ូនទាំងអស់។

ណឺរ៉ូនចលករមាននាទីដឹកនាំអាំងភ្លុចប្រសាទចេញពីខួរក្បាលនិងខួរឆ្អឹងខ្នង ភាគច្រើនដឹកនាំព័ត៌មានដែលធ្វើឲ្យសាច់ដុំនិងក្រពេញធ្វើសកម្មភាព។