ការបោះឆ្នោតជាការពេញចិត្តឬជាការជ្រើសរើសរបស់ប្រជាពលរដ្ឋទៅលើគណបក្សនយោបាយណាមួយ ដែលពួកគេយល់ថាល្អ អាចជាទីពំនាក់ ពឹងពាក់អាស្រ័យ និងអាចដោះស្រាយរាល់បញ្ហាជូនប្រជាពលរដ្ឋបាន។អ្នកដឹកនាំត្រូវមានលក្ខណៈសម្បត្តិល្អមួយចំនួន ទើបអាចធ្វើឱ្យប្រជាពលរដ្ឋបោះឆ្នោតឱ្យបានមានដូចជា៖
• មានចំណេះដឹងនិងជំនាញទូលំទូលាយ
• មានការគោរពច្បាប់និងក្រមសីលធម៌
• មានមនសិការស្នេហាជាតិ ស្រឡាញ់ការរីកចម្រើន និងសុភមង្គល
• មានចិត្តជាអ្នកកីឡាហើយគិតប្រយោជន៍ជាតិជាធំ
• ត្រូវមានសុខភាពល្អនិងប្រាជ្ញាឈ្លាសវៃ
• មានអត់ធ្មត់ និងឆន្ទៈខ្ពស់
• ស្រឡាញ់ប្រជាជន ឱ្យដូចក្រុមគ្រួសាររបស់ខ្លួន
• គិតប្រយោជន៍ជាតិជាធំ និងសុខទុក្ខរាស្ត្រជាចំបង
• មានចិត្តក្លាហាន មិនរុញរា
• ខិតខំកសាងនិងអភិវឌ្ឍន៍ប្រទេសឱ្យរីកចម្រើន។

ប្រទេសកម្ពុជាប្រកាន់យករបបនយោបាយប្រជាធិបតេយ្យសេរីពហុបក្ស ក្នុងនោះមានគណបក្សនយោបាយជាច្រើនប្រកួតប្រជែងដើម្បីដឹកនាំប្រទេស។
បច្ចុប្បន្នប្រទេសកម្ពុជាយើងមានគណបក្សចំនួន 20 គណបក្សនយោបាយ(នីតិកាលទី 6 ឆ្នាំ 2018 ) ចូលរួមប្រកួតប្រជែងក្នុងការបោះឆ្នោតជ្រើរើសតំណាងរាស្ត្រ។ចំណែកឯនៅអាណត្តិទី៥(ឆ្នាំ២០២២)ក្នុងការបោះឆ្នោតក្រុមប្រឹក្សាឃុំសង្កាត់មាន១៧គណបក្សចូលរួមប្រកួតប្រជែង។

ការបង្កើតគណបក្សនយោបាយច្រើនធ្វើឱ្យប្រទេសកម្ពុជាមានលក្ខណៈដូចជា អាចថាជាប្រទេសដែលមានលទ្ធិប្រជាធិបតេយ្យ ផ្តល់សិទ្ធិឱ្យប្រជាពលរដ្ឋពេញលេញខាងនយោបាយ ចំណូលចូលជាតិបានមួយផ្នែក(កញ្ចប់ថ្លៃអាករចុះបញ្ជីគណបក្សនយោបាយ) ផ្លាស់ប្តូរអ្នកដឹកនាំដោយសន្តិវិធី ការតាមដានពីគណបក្សដែលចាញ់ឆ្នោតអាចឱ្យអ្នកដឹកនាំមិនអាចធ្វើអ្វីតាមអំពើចិត្ត ឬធ្វើខុសពីគោលការណ៍ដែលបានដាក់ក្នុងកម្មវិធីនយោបាយរបស់ខ្លួន មានការប្រកួតប្រជែងខ្ពស់ធ្វើឱ្យអ្នកដឹកនាំគណបក្សខិតខំរកវិធីសាស្ត្រឬភាពលេចធ្លោជាងគេក្នុងជួរគណបក្សដើម្បីឆក់យកទឹកចិត្តប្រជាពលរដ្ឋ…។

បានជាប្រទេសនីមួយៗចាំបាច់បង្កើតគណបក្សនយោបាយព្រោះ៖
• ជាតម្រូវការរបស់ប្រទេសក៏ដូចជាប្រជាពលរដ្ឋ
• ចូលរួមប្រកួតប្រជែងគ្នាតាមរយៈការបោះឆ្នោតដើម្បីដឹកនាំរដ្ឋាភិបាល
• ជ្រើសរើសមេដឹកនាំតាមរយៈការបោះឆ្នោត
• ផ្ទេរអំណាចដោយសន្តិវិធី ចៀសវាងការបង្ហូរឈាមគ្នា
• ចៀសវាងការបន្តមរតកអំណាចពីឪពុកទៅកូន និងអំណាចផ្តាច់ការ
• ផ្តល់ឱ្យប្រជាពលរដ្ឋជ្រើសរើសអ្នកដឹកនាំដែលពួកគេពេញចិត្ត
• ឱ្យអ្នកដឹកនាំបម្រើពលរដ្ឋនិងទុកប្រយោជន៍ជាតិជាធំ
• បង្ហាញពីគោលគំនិត និងផ្សព្វផ្សាយគំនិតរបស់ខ្លួនក្នុងការដឹកនាំប្រទេស។

ប្រព័ន្ធនយោបាយនីមួយៗ(ឯកបក្ស ទ្វេបក្ស ពហុបក្ស)ផ្តល់គុណសម្បត្តិនិងគុណវិបត្តិដូចជា៖
 គុណសម្បត្តិ
 ប្រព័ន្ធឯកបក្សៈគណបក្សនយោបាយមានតែមួយងាយស្រួលគ្រប់គ្រង មិនពិបាកក្នុងការបែងចែកអំណាច មិនពិបាកក្នុងការបង្កើតរដ្ឋាភិបាល ការងារលឿនរហ័ស ក្តាប់ព័ត៌មានទាន់សភាពការណ៍ ជាអ្នកដាក់ផែនការឱ្យថ្នាក់ក្រោមអនុវត្ត និងគ្មានការជំទាស់ពីគណបក្សនយោបាយជាមួយ…។
 ប្រព័ន្ធទ្វេបក្សៈមានគណបក្សតែពីរងាយស្រួលក្នុងការប្រកួតប្រជែង ប្រសិនបើម្ចាស់សំឡេងឆ្នោតមិនពេញចិត្តនឹងមាគ៌ារបស់គណបក្សមួយដែលកំពុងដឹកនាំរដ្ឋាភិបាល ម្ចាស់ឆ្នោតនឹងជ្រើរើសបេក្ខភាពគណបក្សមួយទៀត ការផ្ទេរអំណាចត្រូវប្រព្រឹត្តដោយសន្តិភាព។
 ប្រព័ន្ធពហុបក្សៈមានគណបក្សនយោបាយច្រើនចូលរួមប្រកួតប្រជែង ប្រជាពលរដ្ឋមានលទ្ធភាពពិនិត្យមើលទៅលើគណបក្សនយោបាយ ប្រជាពលរដ្ឋគឺជាម្ចាស់ឆ្នោត ផ្តល់ឱកាសដល់អ្នកដែលមានសមត្ថភាពចង់ផ្សព្វផ្សាយគំនិតរបស់ខ្លួន មានលក្ខណៈប្រជាធិបតេយ្យ ការផ្ទេរអំណាចដោយសន្តិវិធី…។
 គុណវិបត្តិ
 ប្រព័ន្ធឯកបក្សៈគណបក្សនយោបាយតែមួយមានភាពពិបាកក្នុងការគ្រប់គ្រងការងារ(ទទួលបន្ទុកម្នាក់ឯង) គោរពតែតាមបញ្ជារបស់គណបក្ស មិនផ្តល់លទ្ធភាពឱ្យប្រជាពលរដ្ឋជ្រើសរើសអ្នកដឹកនាំ គ្មានការផ្តល់គំនិតយោបល់ឬការប្រកួតប្រជែង អ្វីៗត្រូវតែអនុលោមតាមបក្ស គ្មានការប្រឆាំងឬតវ៉ា…។
 ប្រព័ន្ធទ្វេបក្សៈមានតែពីរគណបក្ស គ្មានជម្រើសក្នុងការជ្រើសរើសច្រើន បើគណបក្សទាំងពីររួមគំនិតគ្នានឹងអាចក្លាយជាអំណាចផ្តាច់ការ រាំងខ្ទប់មតិយោបល់ឬទស្សនៈរបស់ក្រុមគណបក្សតូចៗ និងប្រជាពលរដ្ឋគ្មានលទ្ធភាពក្នុងការពិនិត្យមើលទៅលើសកម្មភាពរបស់គណបក្សនយោបាយផ្សេង…។
ប្រព័ន្ធពហុបក្សៈគណបក្សនយោបាយច្រើនសំឡេងឆ្នោតត្រូវបានបែងចែក ដូច្នេះពិបាករកសំឡេងក្នុងការបង្កើតរដ្ឋាភិបាល ការចង់សម្ព័ន្ធភាពជាមួយគណបក្សដទៃ ដើម្បីរកសំឡេងឆ្នោតឱ្យគ្រប់ក្នុងការបង្កើតរដ្ឋាភិបាលគឺអាចមានការខ្វែងគំនិតឬមតិយោបល់អំពីការដឹកនាំរដ្ឋាភិបាល…។