ភាពខុសគ្នារវាងបណ្ដឹងសាទុក្ខ និងបណ្ដឹងជំទាស់ ៖
បណ្ដឹងសាទុក្ខ ៖
• បណ្ដឹងសាទុក្ខ ជាបណ្ដឹងមិនយល់ស្របជាមួយសាលក្រម ឬសាលដីកាទៅតុលាការកំពូល ។
• បណ្ដឹងនេះធ្វើឡើងដើម្បីឱ្យតុលាការកំពូលពិនិត្យទៅលើដីការបស់សាលាឧទ្ធរណ៍ ឬក៏ពិនិត្យទៅលើសាលក្រមរបស់សាលាដំបូង ដោយផ្អែកទៅលើអង្គច្បាប់ ។
• ដើមបណ្ដឹងត្រូវបង្ហាញពីគោលបំណងរបស់ខ្លួនថាសាលក្រម ឬសាលដីកាមានភាពផ្ទុយទៅនឹងរដ្ឋធម្មនុញ្ញ ឬ ច្បាប់ ឬ បទដ្ឋានគតិយុត្តិផ្សេងៗ
• រយៈពេលនៃការដាក់ពាក្យបណ្ដឹងសាទុក្ខ ៖
-ចំពោះសាលក្រមចំពោះមុខ ៖ រយៈពេល១ខែ គិតចាប់ពីថ្ងៃទទួលបានសាលក្រម ។
-ចំពោះសាលក្រមកំបាំងមុខ ៖ រយៈពេល១ខែ គិតចាប់ពីថ្ងៃផុតកំណត់នៃការប្ដឹងទាស់ ។ ករណីមួយទៀត គឺ រយៈពេល១ខែ គិតចាប់ពីថ្ងៃជូនដំណឹងអំពីការសម្រេចច្រានចោលលើបណ្ដឹងទាស់ ។
បណ្ដឹងជំទាស់ ៖
• បណ្ដឹងជំទាស់ជាបណ្ដឹងមិនយល់ស្របនឹងដីកាសម្រេចរបស់សាលាដំបូង ឬសាលាឧទ្ធរណ៍ ទៅសាលាឧទ្ធរណ៍ ឬតុលាការកំពូល ។
• រាល់ដីកាសម្រេចណាដែលអនុញ្ញាតដោយច្បាប់ ទើបអាចប្ដឹងជំទាស់បាន ។
• អ្នកដែលមានសិទ្ធិអាចប្ដឹងជំទាស់បានគឺជាអ្នកដែលបាត់បង់ផលប្រយោជន៍ពីដីកាសម្រេច ។
• រយៈពេលនៃការដាក់ពាក្យប្ដឹងជំទាស់គឺមួយសប្ដាហ៍គិតចាប់ពីថ្ងៃទទួលដីកាសម្រេច ។

ដែនសមត្ថកិច្ចនៃសាលាឧទ្ធរណ៍នីមួយៗ មានដូចជា ៖
• សាលាឧទ្ធរណ៍ភ្នំពេញ មានសមត្ថកិច្ច ជំនុំជម្រះក្ដីដែលស្ថិតនៅក្នុងសមត្ថកិច្ចដែនដីដែលគ្របដណ្ដប់លើរាជធានីភ្នំពេញ ខេត្តកណ្ដាល ខេត្តកំពង់ឆ្នាំង ខេត្តតាកែវ ខេត្តព្រៃវែង និងខេត្តស្វាយរៀង ។
• សាលាឧទ្ធរណ៍ត្បូងឃ្មុំ មានសមត្ថកិច្ច ជំនុំជម្រះក្ដីដែលស្ថិតនៅក្នុងសមត្ថកិច្ចដែនដីដែលគ្របដណ្ដប់លើខេត្តត្បូងឃ្មុំ ខេត្តកំពង់ចាម ខេត្តកំពង់ធំ ខេត្តព្រះវិហារ ខេត្តក្រចេះ ខេត្តស្ទឹងត្រែង ខេត្តរតនគិរី និងខេត្តមណ្ឌលគិរី។
• សាលាឧទ្ធរណ៍ព្រះសីហនុ មានសមត្ថកិច្ច ជំនុំជម្រះក្ដីដែលស្ថិតនៅក្នុងសមត្ថកិច្ចដែនដីដែលគ្របដណ្ដប់លើខេត្តព្រះសីហនុ ខេត្តកោះកុង ខេត្តកំពត និងខេត្តកែប។
សាលាឧទ្ធរណ៍បាត់ដំបង មានសមត្ថកិច្ច ជំនុំជម្រះក្ដីដែលស្ថិតនៅក្នុងសមត្ថកិច្ចដែនដីដែលគ្របដណ្ដប់លើខេត្តបាត់ដំបង ខេត្តពោធិ៍សាត់ ខេត្តប៉ៃលិន ខេត្តបន្ទាយមានជ័យ ខេត្តឧត្តរមានជ័យ និងខេត្តសៀមរាប។

បណ្ដឹងសាទុក្ខ ជាបណ្ដឹងមិនយល់ស្របជាមួយនឹងសាលដីការបស់សាលាឧទ្ធរណ៍ ឬសាលក្រមរបស់សាលាដំបូង ដោយដាក់ពាក្យប្ដឹងទៅតុលាការកំពូល ។

បណ្ដឹងឧបាស្រ័យទៅតុលាការជាន់ខ្ពស់ជាវិធីធ្វើឧបាស្រ័យទាមទារដោយភាគី ទៅតុលាការជាន់ខ្ពស់ឱ្យលប់ចោល ឬផ្លាស់ប្ដូរនូវសេចក្ដីសម្រេច (សាលក្រម សាលដីកា ឬដីកាសម្រេច)ដែលចេញដោយតុលាការថ្នាក់ក្រោមនៅមុនពេលដែលសេចក្ដីសម្រេចនោះចូលជាស្ថាពរ ។