បានជាលទ្ធិប្រជាធិបតេយ្យទាមទារឲ្យមានការបោះឆ្នោតព្រោះ ក្នុងលទ្ធិប្រជាធិបតេយ្យ ប្រជារាស្រ្ដ គឺជាម្ចាស់ទឹកដីម្ចាស់លើជោគវាសនារបស់ប្រទេសជាតិ។ ប្រជារាស្រ្ដជាអ្នកទទួលខុសត្រូវលើអនាគតរបស់ប្រទេស។
ប៉ុន្ដែប្រជារាស្រ្ដទាំងអស់មិនអាចទៅចាត់ចែងកិច្ចការរដ្ឋដោយផ្ទាល់ទាំងអស់គ្នាបានទេ គឺត្រូវជ្រើសរើសបេក្ខជន ដែលខ្លួនពេញចិត្តម្នាក់ ឬច្រើនធ្វើជាតំណាងឲ្យខ្លួនហៅថា តំណាងរាស្រ្ដដើម្បីទៅចាត់ចែងកិច្ចការរដ្ឋជំនួស។
ការជ្រើសរើសនេះត្រូវឆ្លងកាត់តាមរយៈបោះឆ្នោតដែលមាន លក្ខណៈដោយសេរី ត្រឹមត្រូវ និងយុត្តិធម៌។

ដើម្បីអនុវត្តតាមគោលការណ៍លទ្ធិប្រជាធិបតេយ្យអោយបានត្រឹមត្រូវ គេត្រូវបែងចែកអំណាចគ្រប់គ្រងរដ្ឋ (អំណាចនីតិប្បញ្ញត្តិ អំណាចនីតិប្រតិបត្តិ និងអំណាចតុលាការ) អោយដាច់ចេញពីគ្នា ដើម្បីជៀសវាងការរំលោភសិទ្ធិគ្នាទៅវិញទៅមក។

លទ្ធិប្រជាធិបតេយ្យមានសារប្រយោជន៍ដូចជា
– ប្រជាពលរដ្ឋមានសិទ្ធិក្នុងការបោះឆ្នោតរើសតំណាងរបស់ខ្លួន និងមានសិទ្ធិឈរឈ្មោះអោយគេបោះឆ្នោត
– ប្រជាពលរដ្ឋមានសិទ្ធិក្នុងការនិយាយ មតិយោបល់ ឬបង្កើតសមាគម គោរពជំនឿសាសនារបស់ខ្លួន និងសិទ្ធិស្មើគ្នាចំពោះមុខច្បាប់
– រាល់ការគ្រប់គ្រងនិងដឹកនាំ ត្រូវបានប្រព្រឹត្តឡើងទៅតាមច្បាប់ តាមឆន្ទៈរបស់ពលរដ្ឋ
– ប្រជាពលរដ្ឋគ្រប់រូបមានសិទ្ធិក្នុងការបង្កើតគណបក្សនយោបាយ សិទ្ធិប្រជុំ សិទ្ធិធ្វើកូដកម្ម ឬបាតុកម្ម សមស្របតាមច្បាប់កំណត់និងមានសិទ្ធិអាចធ្វើបណ្ដឹងសាទុក្ខ ទៅលើការកាត់ក្ដីរបស់តុលាការដែលខ្លួនយល់ថាមានការលំអៀង និងអយុត្តិធម៌។