នៅក្នុងមនុស្សមានឈាមប្រហែល 8% នៃសារពាង្គកាយ ។ ឧទាហរណ៍ មនុស្សទម្ងន់ 45kg ឈាមដែលធ្វើចលនាក្នុងសារពាង្គ-កាយប្រហែល 3.6kg។

និយាយពីរបត់ឈាមខ្លី របត់ឈាមវែង និងរបត់ឈាមកូរ៉ូណែ ៖
• របត់ឈាមខ្លី ដំបូងឈាមចេញពីបេះដូងទៅកាន់សួតដោយដឹកនាំកាកសំណល់និងឧស្ម័នកាបូនិចនៃកោសិកាទៅឱ្យសួតបន្ទាប់មកឈាមចេញពីសួតដោយដឹកនាំអុកស៊ីសែនទៅបេះដូងវិញ ។( ជាដំណើរឈាមរវាងបេះដូង និងសួត)។
• របត់ឈាមវែង ឈាមចេញពីបេះដូងដោយដឹកនាំអាហារនិងអុកស៊ីសែនទៅឱ្យកោសិកានៃសារពាង្គកាយបន្ទាប់មកឈាមដឹកនាំកាកសំណល់និងឧស្ម័នកាបូនិចពីកោសិកាចូលទៅបេះដូងវិញ។(ជាដំណើរឈាមរវាងបេះដូង និងកោសិកានៃសារពាង្គកាយ )។
• របត់ឈាមកូរ៉ូណែ បេះដូងមានសរសៃឈាមផ្សេងទៀតសម្រាប់ផ្គត់ផ្គង់សារធាតុចិញ្ចឹមនិង O2 ដល់កោសិកាបេះ-ដូង និងដកយកកាកសំណល់មកវិញ។

នាទីរបស់អាកទែ វ៉ែន និងសរសៃប្តូរ ៖
• អាកទែ មាននាទីដឹកនាំឈាមចេញពីបេះដូងទៅកាន់គ្រប់ផ្នែកទាំងអស់នៃសារពាង្គកាយ ។
• វ៉ែន មាននាទីដឹកនាំឈាមពីគ្រប់ផ្នែកទាំងអស់នៃសារពាង្គកាយទៅកាន់បេះដូង ។
• សរសៃប្តូរ មាននាទីអាចអោយធាតុរាវនៃឈាមជ្រាបឆ្លងកាត់វាបាន។

បេះដូងគឺជាសាច់ដុំមានពណ៌ក្រហមប្រហោងក្នុងដែលមានទំហំប៉ុនដៃក្តាប់។ វាស្ថិតនៅក្នុងប្រអប់ទ្រូងនៅចន្លោះសួតទាំងពីរ។