ដំណើរការពិសោធន៍១( រកវត្តមានអាមីដុងក្នុងស្លឹករុក្ខជាតិ)៖
• យកបន្ទះកំណាត់ខ្មៅទៅបាំងផ្នែកណាមួយលើផ្ទៃទាំងសងខាងរបស់ស្លឹកហើយយករុក្ខ-ជាតិនេះទៅដាក់ឱ្យត្រូវពន្លឺព្រះអាទិត្យរយៈពេល៣ថ្ងៃ។
• បន្ទាប់មកយកកន្ត្រៃកាត់ស្លឹកឈើចេញពីដើមព្រមទាំងយកកំណាត់ខ្មៅចេញពីស្លឹក។យកកែវដែលមានទឹកជិតពេញ ដាក់លើចង្រ្កានរួចដុតភ្លើងតិចៗរហូតដល់ពុះ។ ប្រើដង្កៀបចាប់យកបំពង់កែវក្រិតដែលមានអាល់កុលប្រហែល១០០ml ទៅដាក់ក្នុងកែវទឹកពុះ(ដែលបានរៀបរាប់ខាងលើ)រហូតដល់អាល់កុលក្នុងបំពង់កែវក្រិតពុះ។ បន្ទាប់មកទើបប្រើដង្កៀបចាប់យកស្លឹកទៅដាក់ក្នុងអាល់កុលដែលកំពុងពុះនោះឱ្យបានប្រហែល៣០នាទី ដើម្បីដកយកក្លរ៉ូភីលចេញពីស្លឹក។ បន្ទាប់មកប្រើដង្កៀបចាប់យកស្លឹកចេញពីបំពង់កែវក្រិត ដែលមានអាល់កុលកំពុងពុះនោះ ទៅដាក់លាងសំអាតក្នុងកែវទឹកក្ដៅឧណ្ហៗ។
• ប្រើដង្កៀបចាប់យកស្លឹកចេញពីកែវទឹកក្ដៅឧណ្ហៗទៅដាក់ក្នុងទឹកអ៊ីយ៉ូតវិញ។យើងសង្កេតឃើញថា ផ្នែកមិនបាំងបន្ទះកំណាត់ខ្មៅមានពណ៌ស្វាយ នេះបញ្ជាក់ថាមាន
អាមីដុង។
ផ្នែកមានបាំងបន្ទះកំណាត់ពណ៌ខ្មៅ បញ្ជាក់ថាគ្មានអាមីដុង។ ស្លឹកមានអាមីដុងនៅផ្នែកមិនបាំងបន្ទះកំណាត់ពណ៌ខ្មៅបញ្ជាក់ថារស្មីសំយោគកើតមានឡើងនៅទីនោះ។

ឧស្ម័នអុកស៊ីសែន(O2)ស្ទើរទាំងអស់នៅក្នុងបរិយាកាសនៃផែនដីត្រូវបានផលិតឡើងដោយរុក្ខជាតិបៃតងតាមដំណើររស្មីសំយោគ ។

រស្មីសំយោគមាន២ដំណាក់កាលគឺ៖
• ការចាប់យកថាមពលពន្លឺព្រះអាទិត្យ : រុក្ខជាតិបៃតង ផ្ទុកសារធាតុគីមី(ក្លរ៉ូភីល)ចាំបាច់
សម្រាប់ដំណើររស្មីសំយោគ។ កោសិកាស្លឹកនិងកោសិកាដើមរុក្ខជាតិមួយចំនួនមានផ្ទុកសារធាតុគីមីនេះ ហើយក្លរ៉ូភីលមាននាទីចាប់យកថាមពលពន្លឺព្រះអាទិត្យ។
• ការផលិតស្ករ : ដំណាក់កាលនេះរុក្ខជាតិត្រូវការ ទឹក និងឧស្ម័នកាបូនិច(CO2)។ ឫសស្រូបយកទឹកក្នុងដី បន្ទាប់មកទឹកធ្វើចលនាឡើងតាមដើមទៅស្លឹករុក្ខជាតិតាមជាលិកានាំស៊ីឡែម។ ចំណែកឧស្ម័នកាបូនិច(CO2)ក្នុងបរិយាកាសសាយចូលទៅក្នុងស្លឹករុក្ខជាតិតាមស្តូម៉ាត។ ក្នុងស្លឹក ទឹកនិង CO2 ធ្វើដំណើរទៅកាន់ក្លរ៉ូប្លាសដែលផ្ទុកក្លរ៉ូភីល។ បន្ទាប់មក
ពន្លឺព្រះអាទិត្យដែលក្លរ៉ូភីលចាប់បានជួយដល់ការភ្ជាប់ CO2 និង H2O ដើម្បីផលិតគ្លុយកូស(C6H12O6) និងបំភាយឧស្ម័នអុកស៊ីសែន(O2)។

ដំណើររស្មីសំយោគអាចកើតមាននៅក្នុងគ្រប់ កោសិកា រុក្ខជាតិដែលផ្ទុកក្លរ៉ូភីល ចំពោះរុក្ខជាតិថ្នាក់ខ្ពស់ រស្មីសំយោគធ្វើឡើងនៅក្នុងសរីរាង្គពិសេសមួយគឺ ស្លឹក។