លទ្ធិប្រជាធិបតេយ្យ មានសារប្រយោជន៍ ដូចតទៅ ៖
• ផ្ដល់សិទ្ធិអំណាចដល់ប្រជាជន ឱ្យចូលរួមក្នុងការអភិវឌ្ឍជាតិយ៉ាងពេញលេញ។
• ប្រជាជនមានសិទ្ធិសម្រេចលើជោគវាសនានៃប្រទេសជាតិខ្លួន។
• ការគ្រប់គ្រងរដ្ឋតាមបែបប្រជាធិបតេយ្យ នាំឱ្យប្រទេសទទួលបានការរីកចម្រើនស្ទើរគ្រប់វិស័យ ពិសេសសេរីភាពក្នុងការបញ្ចេញមតិ។
• ប្រទេសជាតិឈានទៅរកភាពសម្បូរសប្បាយ រុងរឿង ផ្នែកសេដ្ឋកិច្ច សង្គមកិច្ច វប្បធម៌ អារ្យធម៌ និងក្នុងវិស័យផ្សេងៗទៀត។
• មានសេរីភាពខាងសារព័ត៌មាន រដ្ឋនិងឯកជន
• បើកទូលាយវិស័យវិនិយោគទុនផ្សេងៗ

• របបពាក់កណ្ដាលសភានិយមនិងពាក់កណ្ដាលប្រធានាធិបតីនិយម ប្រជាពលរដ្ឋបោះឆ្នោតថ្នាក់ជាតិពីរលើក។ លើកទីមួយគឺ បោះឆ្នោតជ្រើសរើសសមាជិករដ្ឋសភា ហើយសមាជិករដ្ឋសភាគណបក្សឈ្នះឆ្នោត ជ្រើសរើសនាយករដ្ឋមន្ត្រីដើម្បីបង្កើតរដ្ឋាភិបាល។ លើកទីពីរគឺ ពលរដ្ឋ បោះឆ្នោតជ្រើសរើសប្រធានាធិបតី ដើម្បីតំណាងឱ្យប្រទេសជាតិទាំងមូល។ ក្នុងរបបនេះ មាននាយករដ្ឋមន្ត្រីផង មានទាំងប្រធានាធិបតីផង។

• របបប្រធានាធិបតីនិយម ពលរដ្ឋបោះឆ្នោតថ្នាក់ជាតិពីរលើកផ្សេងៗគ្នា។ លើកទីមួយ គឺបោះឆ្នោតជ្រើសរើសសមាជិកសភាដើម្បីបង្កើតជាក្រុមនីតិបញ្ញត្តិសម្រាប់តាក់តែងច្បាប់ និងលើកទីពីរ គឺបោះឆ្នោតជ្រើសរើសប្រធានាធិបតី ដើម្បីបង្កើតរដ្ឋាភិបាល និងសម្រាប់ប្រតិបត្តិច្បាប់ដែលសភា អនុម័ត។ ប្រធានាធិបតី ជាប្រមុខរដ្ឋាភិបាលតំណាងប្រទេសជាតិទាំងមូល ហើយរបបនេះគ្មាននាយករដ្ឋមន្ត្រីទេ។ ក្នុងរបបនេះ អំណាចនីតិបញ្ញត្តិ និងអំណាចនីតិប្រតិបត្តិ នៅដាច់ពីគ្នា។

លក្ខណៈពិសេស នៅក្នុងសង្គមប្រជាធិបតេយ្យមាន ៖
• រដ្ឋធម្មនុញ្ញចែងយ៉ាងច្បាស់សិទ្ធិជាមូលដ្ឋានរបស់ពលរដ្ឋម្នាក់ៗ ដូចជា សិទ្ធិរស់រានមានជីវិត សិទ្ធិមានទ្រព្យសម្បត្តិ សិទ្ធិមានសន្តិសុខផ្ទាល់ខ្លួន សិទ្ធិទទួលព័ត៌មាន សិទ្ធិស្មើភាពចំពោះមុខច្បាប់ជាដើម។
• ច្បាប់បានចែងលម្អិតអំពីសិទ្ធិទាំងនោះ និងបង្កើតស្ថាប័ន ដើម្បីធ្វើឱ្យសិទ្ធិទាំងនោះសម្រេចបានដោយពេញលេញ។
• ប្រព័ន្ធតុលាការឯករាជ្យសម្រាប់ការពារសិទ្ធិស្មើៗគ្នារបស់បុគ្គលគ្រប់រូប។
• បើកទូលាយការយល់ដឹងអំពីសិទ្ធិ និងកាតព្វកិច្ចរបស់ប្រជាពលរដ្ឋ។
• សមត្ថកិច្ចរដ្ឋអំណាច កម្លាំងប៉ូលីស គោរពសិទ្ធិពលរដ្ឋ និងផ្ដល់កិច្ចការពារដ៏មានប្រសិទ្ធិភាព ប្រឆាំងនឹងរាល់អំពើរំលោភបំពានសិទ្ធិប្រជាពលរដ្ឋ។
• មានសេវាប្រឹក្សាច្បាប់ប្រកបដោយគុណសម្បត្តិ ដើម្បីជួយពលរដ្ឋក្នុងការទាមទារសិទ្ធិរបស់គេនៅតុលាការ។
• ចៅក្រម មានសិទ្ធិជម្រះក្ដី និងបំពេញកិច្ចការនេះដោយគោរពច្បាប់យ៉ាងម៉ឺងម៉ាត់ និងប្រកបដោយសតិសម្បជញ្ញៈរបស់ខ្លួន។ មានតែសេចក្ដីសម្រេចចិត្តរបស់តុលាការទេ ដែលមានអានុភាពគតិយុត្តិបញ្ជាក់ពីពិរុទ្ធភាព។