• តម្លាភាព ក្នុងគោលការណ៍ប្រជាធិបតេយ្យមានន័យថា អ្វីៗដែលរដ្ឋាភិបាលបានធ្វើ ត្រូវតែធ្វើដោយបើកចំហឱ្យប្រជាជនបានដឹងឮ មានន័យថា ត្រូវអនុញ្ញាតឱ្យអ្នកកាសែត និងប្រជាជនសាកសួរព័ត៌មាន អំពីកិច្ចការទាំងនោះ ជាពិសេស ចំណាយ ចំណូលក្នុងការអនុវត្តគម្រោងកម្មវិធីអភិវឌ្ឍន៍នានារបស់រដ្ឋាភិបាល។

ដើម្បីឱ្យលទ្ធិប្រជាធិបតេយ្យ មានលក្ខណៈពេញលេញ ត្រូវមានគោលការណ៍ដូចតទៅ ៖
• ការចូលរួមចំណែកពីប្រជាជន
• ការស្មើភាពគ្នា
• ការអនុគ្រោះគ្នា
• សេរីភាពសារព័ត៌មាន
• ការទទួលខុសត្រូវ
• តម្លាភាព
• ការបោះឆ្នោតដោយសេរី និងយុត្តិធម៌តាមការកំណត់
• សេរីភាពខាងសេដ្ឋកិច្ច
• យន្តការទប់ស្កាត់ការប្រើអំណាចដោយរំលោភ
• ប្រព័ន្ធពហុបក្ស

• ដែលហៅថាប្រជាធិបតេយ្យផ្ទាល់ គឺប្រជាពលរដ្ឋទាំងអស់ចូលរួមដោយផ្ទាល់ក្នុងការធ្វើសេចក្ដីសម្រេចជាសាធារណៈ។ ប្រភេទនៃលទ្ធិប្រជាធិបតេយ្យនេះ ប្រព្រឹត្តទៅបានល្អបំផុតក្នុងចំណោមក្រុមតូចៗនៃប្រជាពលរដ្ឋ។ ឧទាហរណ៍ ៖ ក្រុមប្រឹក្សាភូមិមួយ មានសមាជិកក្នុងភូមិជួបជុំគ្នា ដើម្បីពិភាក្សាបញ្ហាដែលជាប្រយោជន៍រួមដោយធ្វើការបោះឆ្នោត។

• នៅក្នុងលទ្ធិប្រជាធិបតេយ្យ ប្រជាពលរដ្ឋទាំងអស់ មានអំណាចក្នុងការសម្រេចចិត្តនៅពេលបោះឆ្នោតជ្រើសរើសគណបក្សណាមួយដែលគេគាំទ្រ ព្រោះការបោះឆ្នោត ជាការផ្ទេរអំណាចរបស់ខ្លួនទៅឱ្យមនុស្សមួយក្រុមទៀត ដើម្បីធ្វើការបម្រើខ្លួន។

• ក្នុងប្រទេសដែលកាន់លទ្ធិប្រជាធិបតេយ្យ រដ្ឋាភិបាលធ្វើសកម្មភាពឬសម្រេចវិធានការ ត្រូវស្ថិតនៅក្រោមមូលដ្ឋាននៃច្បាប់ជានិច្ច គឺមិនអាចមានបុគ្គល ឬក្រុមមនុស្សណាប្រព្រឹត្តល្មើសច្បាប់បានទេ។