ខ្ញុំសង្កេតឃើញថា មនុស្សដែលជួយបញ្ហាតានតឹងចិត្តភាគច្រើនកើតឡើងដោយសារ
– គ្មានលុយចាយគ្រប់គ្រាន់
– ប្រពន្ធដែលមានប្ដីមិនជួយរកចំណូល
– ខូចចិត្ត
– មិនសម្រេចបំណងប្រាថ្នា
– ប្រព្រឹត្តកំហុសដ៏ធ្ងន់ធ្ងរ
– បាត់បងអ្នកជាទីស្រឡាញ់

បញ្ហានៅក្នុងសង្គមក៏អាចនាំឱ្យមនុស្សមានការតានតឹងចិត្តដែរ ។ បញ្ហាទាំងនោះមានដូចជា គ្រោះទុរភិក្ស ភាពក្រីក្រ សង្គ្រាម គ្រោះធម្មជាតិ រៀនខ្សោយ ឬការប្រលងធ្លាក់ ការបាត់បង់ ឬគ្មានការងារធ្វើ អំពើអបាយមុខ ការគំរាមគំហែង អំពើហិង្សា ការរំលោភសិទ្ធិមនុស្ស និងការមិនគោរពច្បាប់។

អ្នកតានតឹងចិត្តមានរោគសញ្ញាផ្លូវចិត្ត
– មួម៉ៅ ឆេវឆាវ ឆាប់ខឹង ឆាប់ច្រឡោត អាចជំរុញឱ្យមានអំពើហិង្សា
– នឿយណាយ ធុញថប់ក្នុងអារម្មណ៍ ភ្លេចភ្លាំងច្រើន ភ័យខ្លាច
– ខ្វល់ខ្វាយ គិតព្រួយច្រើន ស្រងូតស្រងាត់ ពិបាកផ្ចង់អារម្មណ៍ក្នុងការងារ និងការរៀនសូត្រ
– អារម្មណ៍មិនមូល គិតតែរឿងដដែលៗមិនឈប់មិនឈរ ព្រួយបារម្ភ អស់ សង្ឃឹម។

ការតានតឹងចិត្តអាចដោះស្រាយយូរ ឬក៏ឆាប់វាអាស្រ័យទៅលើខ្លួនផ្ទាល់ និងទំហំនៃបញ្ហាដែលជួបប្រទះ។ កាលណាសាមីខ្លួនមានការតាំងចិត្តខ្ពស់ ឬបញ្ហាដែលជួប្រទះតិចតួច វានឹងអាចរលុបបាត់ទៅវិញក្នុងរយៈពេលខ្លីបាន។ ផ្ទុយទៅវិញ បើបញ្ហាដែលជួបធ្វើឱ្យប៉ះពាល់ដល់ផ្លូវចិត្តខ្លាំង ឬដិតជាប់នៅក្នុងអារម្មណ៍ខ្លាំង វាត្រូវការអ្នកព្រឹក្សាបន្ថែម និងចំណាយពេលយូរ ដើម្បីដោះស្រាយ។