ថ្នាំមាន២ប្រភេទគឺ ៖
• ថ្នាំស្របច្បាប់
ឧទាហរណ៍ ឱសថ ស្រា បារី។
• ថ្នាំខុសច្បាប់
ឧទាហរណ៍ កញ្ឆា អាភៀន ជាថ្នាំមិនស្រប
ច្បាប់។

វិបត្តិកង្វះអាហារជាការបរិភោគអាហារមួយប្រភេទតិចហួសហេតុ។
ឧទាហរណ៍ : មនុស្សម្នាក់ត្រូវការប្រូទីត 1g ក្នុងមួយថ្ងៃ សម្រាប់ទម្ងន់ខ្លួន 1kg ។ (មនុស្សប្រុសពេញវ័យ ត្រូវការ 1.5g-2g)។ ចំពោះខ្លាញ់ត្រូវការ 0.6g ក្នុងទម្ងន់
1kg ក្នុងមួយថ្ងៃ។
បើសិនកង្វះប្រូទីត វានឹងបង្អាក់ការលូតលាស់មិនអាចជួសជុលកោសិកាខូចបានទេ។

សារពាង្គកាយត្រូវការអាហារសំខាន់ៗសម្រាប់សុខភាពដូចជា៖
• អាហារផ្តល់ថាមពល : គ្លុយស៊ីត ប្រូទីត ខ្លាញ់។
• អាហារមិនផ្តល់ថាមពល : ទឹក អំបិលខនិជ វីតាមីន សែលុយឡូស។

ជំងឺទល់លាមកបណ្ដាលមកពី កង្វះជាតិ
សែលុយឡូសក្នុងរបបអាហារ ។ ការបរិភោគអាហារមិនទៀងទាត់ ការផឹកទឹកតិចពេក កង្វះលំហាត់ប្រាណ ឬការប្រើថ្នាំបញ្ចុះជានិច្ចកាល។

ជំងឺរលាកថ្លើមបង្កឡើងដោយ វីរុស។
– ជំងឺរលាកថ្លើមដែលគេច្រើនជួបប្រទះ មាន៣ប្រភេទគឺ
• រលាកថ្លើមប្រភេទ A ឆ្លងច្រើនជាងគេ។ វាឆ្លងតាមរយៈអាហារដែលលាងមិនបានស្អាតល្អ តាមការប៉ះពាល់ផ្ទាល់ជាមួយអ្នកជំងឺ ឬប្រើទឹកដែលមានមេរោគរលាកថ្លើម ។ ក្រោយពេលបង្ករោគលើស៤៥ថ្ងៃទៅ វាចេញរោគសញ្ញាដូចជា ឈឺក្បាល គ្រុនក្ដៅ បាត់បង់រសជាតិ ហើយស្បែកនិងប្រស្រីភ្នែកឡើងពណ៌លឿង ។ អ្នកជំងឺជៀសវាងបរិភោគអាហារមានជាតិខ្លាញ់ច្រើន និងសម្រាកឱ្យបានច្រើន។
• រលាកថ្លើមប្រភេទ B និង C ឆ្លងតាមរយៈឈាម ដោយការបញ្ចូលឈាមដែលមានមេរោគថ្លើមប្រភេទ B ឬC តាមការប្រើម្ជុលចាក់ថ្នាំមិនស្អាត ឬប្រើឧបករណ៍វះកាត់ ឬដកធ្មេញមិនបានរំងាប់មេរោគ។ ជំងឺនេះឆ្លងតាមការរួមភេទផងដែរ។