ក្នុងរយៈពេល២ទៅ៣សែនឆ្នាំ បណ្តុំភពតូចៗរីកធំឡើងៗចាប់ទំហំប៉ុនអតិសុខុមប្រាណរហូតដល់ទំហំប៉ុនផ្ទាំងថ្មធំៗ ហើយចុងបញ្ចប់រហូតដល់មានអង្គត់ផ្ចិត១គីឡូម៉ែត្រ ហើយបណ្តុំភពតូចៗក្លាយទៅជាបណ្តុំភពធំជាងគេចាប់ផ្តើមសំអាតធូលីនិងកម្ទេចកម្ទីនៅក្នុងគន្លងរបស់វាទីបំផុតក្លាយទៅជាភព។

ដំណើរកំណកំណើតប្រព័ន្ធព្រះអាទិត្យមាន៦ដំណាក់កាលគឺ៖
• ណេប៊ុយឡាព្រះអាទិត្យដំបូងចាប់ផ្តើមទង្គិចគ្នាដោយសារទំនាញ។
• ណេប៊ុយឡាព្រះអាទិត្យចាប់ផ្តើមវិលជុំវិញខ្លួនឯងបង្កើតរាងសំប៉ែតនិងក្តៅនៅចំណុចកណ្តាល។
• បណ្តុំភពតូចៗចាប់ផ្តើមកកើតនៅក្នុងរង្វិលរាងថាស។
• បណ្តុំភពតូចៗចាប់ផ្តើមប្រមូលផ្តុំធូលីនិងឧស្ម័នក្នុងណេប៊ុយឡាព្រះអាទិត្យបានកាន់តែច្រើនឡើងព្រោះពួកវាមានកម្លាំងទំនាញខ្លាំង។
• បណ្តុំភពតូចៗទង្គិចជាមួយបណ្តុំភពធំៗហើយភពទាំងឡាយចាប់ផ្តើមរីកធំឡើងៗ។
• ធូលីនិងឧស្ម័នដែលនៅសល់ត្រូវបានសំអាតពីណេប៊ុយឡាព្រះអាទិត្យបន្តិចម្តងៗ ហើយបន្សល់ទុកនូវភពទាំងឡាយធ្វើដំណើរជុំវិញព្រះអាទិត្យ។

• ដីកកើតដោយសារអន្តរកម្មរវាងសិលាជាមួយអាកាសធាតុ កត្តាជីវៈ និងវដ្តធារាសាស្ត្រនៅតំបន់មួយ។ ជំហានទីមួយនៃដំណើរកំណកំណើតដី គឺការបំបែកសិលាតាមបាតុភូតរូប ឬមេកានិច និងបាតុភូតគីមីដែលហៅថា ដំណើរពុកផុយ។
• ដីកើតឡើងនៅនឹងកន្លែងដែលមានសិលាមេ (ពោលគឺកើតឡើងនៅត្រង់កន្លែង ឬនៅមិនឆ្ងាយពីរួបធាតុមេ) ដូចជាសិលាក្រែ ស៊ីសឥដ្ឋ សិលាបាសាល់ និងថ្មកំបោរយើងអាចឃើញមាននៅក្នុងប្រទេសកម្ពុជានាពេលបច្ចុប្បន្ន។
• ដីកើតពីដំណើរពុកផុយនៃសារធាតុកំអែភ្នំភ្លើង ដូចជាប្រភេទដីនៅភូមិភាគ‌ឦសាននៃប្រទេសកម្ពុជាជាដើម។ ដីនៅតំបន់វាលទំនាបនៃប្រទេសកម្ពុជាបានកើតឡើង និងកំពុងតែបន្តកើតឡើងដោយសារដីល្បាប់ដែលហូរបញ្ជូនតាមទឹកទន្លេមេគង្គនិងទន្លេសាប។

វាយភាពដី គឺជាសមាមាត្រធៀបនៃចុណ្ណភាគខ្សាច់ ល្បាប់ម៉ដ្ឋនិងដីឥដ្ឋ។ ឧទាហរណ៏ ដីខ្សាច់មានរន្ធប្រហោងធំៗដែលអាចអោយទឹកជ្រាបឆ្លងកាត់រហ័សជាងដីឥដ្ឋ។ ដីខ្សាច់មានសភាពគ្រោតគ្រាត និងមិនស្អិតជាប់គ្នាទេនៅពេលដែលគេច្របាច់។ ដីឥដ្ឋស្អិតនិងងាយលុញអោយមូលបាន។ វាយភាពដីល្បាប់ម៉ដ្ឋស្ថិតនៅចន្លោះដីឥដ្ឋនិងដីខ្សាច់ ហើយវាស្អិតជាប់គ្នាជាបង្គូរ។

បំរើបំរាស់ដីត្រូវអោយមានតុល្យភាពរវាងដីសំរាប់សាងសង់ និងសំរាប់កសិកម្ម។ បើរយើងដីសំរាប់សាងសង់ទីក្រុង ភូមិករ ទីប្រជុំជន ឬសាងសង់រោងចក្រច្រើនពេកនាំអោយដីសំរាប់កសិកម្មមានការខ្វេះខាត។ បើកំនើនប្រជាជនកាន់តែច្រើន តំរូវការស្បៀងអាហារកាន់តែមានច្រើនដែរ។ ក្នុងករណីដីសំរាប់កសិកម្មទំហំតូច គេត្រូវការប្រើប្រាស់វាទៅតាមលទ្ធភាពដើម្បីអភិវឌ្ឍដំនាំថ្មីៗអោយកាន់តែប្រសើរ។ ការអភិវឌ្ឃកសិកម្មត្រូវអនុវត្តតាមវិធីដាំដុះបែបប្រព័ន្ធកសិកម្ម រួមមានបំលាស់ដំណាំប្រពលវប្បកម្ម និងកសិរុក្ខកម្ម។