ឈាមមាននាទីសំខាន់ 5 បែបដូចជា ៖
• ដឹកនាំសារធាតុចិញ្ចឹម : មានដូចជា គ្លុយកូស អាស៊ីតអាមីនេ វីតាមីន រ៉ែ និងអុកស៊ីសែនទៅ គ្រប់កោសិកាទាំងអស់នៃរាងកាយ។ កាក សំណល់មេតាបូលីសមានដូចជា កាបូនឌីអុកស៊ីត អ៊ុយរ៉េ ទឹក ត្រូវដឹកនាំតាម ឈាមទៅកាន់សរីរាង្គបញ្ចេញចោល។
• ដឹកនាំអរម៉ូន: អរម៉ូនដែលផលិតចេញពីក្រពេញ អង់ដូគ្រីន ត្រូវដឹកនាំតាមឈាមទៅកាន់ជាលិកា និងកោសិកាគោលដៅ។
• តម្រូវកម្ដៅនិងថេរលំនឹង : ឈាមស្រូបកម្តៅពី ផ្នែកក្ដៅនៃរាងកាយ ហើយបញ្ចេញកម្ដៅនោះ ឱ្យទៅជាផ្នែកត្រជាក់។ ម្យ៉ាងវិញទៀត ឈាម រក្សាលំនឹង pH និងតុល្យភាពទឹក។ សារធាតុ មួយចំនួនដែលរលាយក្នុងឈាម ធន់នឹងការ ប្រែប្រួលរបស់ pH។ សារធាតុខ្លះទៀតនៅក្នុង ឈាមការពារមិនឱ្យទឹកចាកចេញពីឈាម និង ចូលក្នុងជាលិកានៃរាងកាយច្រើនពេក។
• កំណកឈាម : ឈាមមានផ្ទុកប្រូតេអ៊ីនដែល អាចឱ្យមានកំណកឈាម។ ដូចនេះកំណក ឈាមការពារសារពាង្គកាយពីការបាត់បង់ឈាមក្នុងពេលមានរបួស។
• តំណបស៊ាំ : ឈាមមាននាទីដឹកនាំកោសិកា
ពិសេស និងសារធាតុគីមីដែលការពារ សារពាង្គកាយប្រឆាំងទប់ទល់នឹងវីរុស និង បាក់តេរីជាដើម។

ដំណើររបត់ឈាមមាន2ប្រភេទដូចជា ៖
• របត់ឈាមសួត(របត់ឈាមខ្លី) បន្ថែម អុកស៊ីសែន និងដកយកកាបូនិចពីឈាម។ ឈាមខ្សត់អុកស៊ីសែនមកពីជាលិកាផ្សេងៗ របស់រាងកាយត្រឡប់ចូលបេះដូង ។ ឈាមនេះ ចូលទៅក្នុងថតលើស្ដាំ ហើយហូរចូលទៅក្នុង ថតក្រោមស្ដាំ ។ ថតក្រោមស្ដាំរុញឈាមនេះ តាមសរសៃអាកទែសួតចូលទៅសួត។ អាកទែ សួត ជាអាកទែតែមួយគត់ដែលដឹកនាំឈាម ខ្សត់អុកស៊ីសែន។អាកទែដទៃទៀតដឹកនាំឈាមសម្បូរអុកស៊ីសែន ។ ឈាមធ្វើដំណើរតាម សរសៃប្ដូរទៅក្នុងសួត វាទទួលបានអុកស៊ីសែន និងបោះបង់កាបូនិច។ សរសៃប្ដូរទាំងនេះ បញ្ចូលគ្នាទៅជាវ៉ែនសួត។ វ៉ែនទាំងនេះដឹកនាំ ឈាមសម្បូរអុកស៊ីសែនទៅកាន់ថតលើឆ្វេង របស់បេះដូង។ វ៉ែនសួត ជាវ៉ែនតែមួយគត់ដែល ដឹកនាំឈាមសម្បូរអុកស៊ីសែន ។ វ៉ែនដទៃទៀត ដឹកនាំឈាមខ្សត់អុកស៊ីសែន។
• របត់ឈាមទូទៅ(របត់ឈាមវែង)ឈាមចេញពីថតលើឆ្វេង ហូរចូលថតក្រោមឆ្វេង ។ របត់
ឈាមទូទៅចាប់ផ្ដើមចេញពីថតក្រោមឆ្វេងនៃ
បេះដូង។ ថតក្រោមឆ្វេងខ្លាំងមានជញ្ជាំងក្រាស់ ជាងថតផ្សេងៗនៃបេះដូង ព្រោះវារុញឈាមទៅ គ្រប់កន្លែងទាំងអស់នៃរាងកាយ។ ចេញពីថត ក្រោមឆ្វេង ឈាមត្រូវបានរុញចូលទៅក្នុង អាអក។ អាអកបែកខ្នែងបង្កើតបានជាសរសៃ
អាកទែដែលបម្រើគ្រប់ផ្នែកទាំងអស់នៃរាងកាយអាកទែចែកជាបន្តបន្ទាប់ បង្កើតបានជាសរសៃ ឈាមតូចៗច្រើន(សរសៃប្ដូរ)។ បណ្ដូររូបធាតុរវាងឈាមនិងជាលិកាកើតមានឡើងតាមរយៈភ្នាសសរសៃប្ដូរ។ សរសៃប្ដូរច្រើន បង្កើតបានជាវ៉ែន ហើយវ៉ែនទាំងនេះដឹកនាំ ឈាមទៅកាន់បេះដូងវិញ។

សរសៃឈាមមាន3ប្រភេទ ៖
• សរសៃអាកទែ : ដឹកនាំឈាមពីបេះដូងទៅកាន់ ជាលិកាផ្សេងៗនៃសារពាង្គកាយ។ គ្រប់សរសៃ អាកទែទាំងដឹកនាំឈាមសម្បូរ O2 លើកលែង តែអាកទែសួត។ ភ្នាសរបស់អាកទែក្រាស់ហើយ
យឺត។ ភ្នាសរបស់វា3ស្រទាប់។ ស្រទាប់ក្នុង រលីង ដែលកើតឡើងពីជាលិកាអេពីតេល្យូម។ ស្រទាប់កណ្ដាលជាជាលិកាសាច់ដុំ។ ស្រទាប់ ក្រៅជា ជាលិកាសន្ធាន ដែលបត់បែនបាន។ ដោយសារទម្រង់របស់ស្រទាប់ទាំងនេះ អាកទែ មានលក្ខណៈរឹងមាំ និងបត់បែនបាន ។ អាកទែ អាចធន់នឹងសម្ពាធឈាមខ្ពស់ ដូចជា នៅពេល ឈាមចេញពីបេះដូង និងពេលឈាមចូល បេះដូងវិញ។
• សរសៃវ៉ែន : ដឹកនាំឈាមពីជាលិការបស់ សារពាង្គកាយត្រឡប់ចូលបេះដូងវិញ។ ភ្នាស សរសៃវ៉ែនស្ដើង និងមានភាពយឺតតិចតួច ប៉ុណ្ណោះ។ នៅក្នុងសរសៃវ៉ែនមានប្រឹសដែល អាចឲ្យឈាមហូរតាមទិសដៅតែមួយឆ្ពោះទៅកាន់បេះដូង។ វ៉ែននៅក្នុងដៃនិងជើងមានប្រឹស ច្រើន ដើម្បីជួយទប់ទល់មិនឲ្យឈាមហូរច្រាស់ ត្រឡប់ទៅបេះដូងវិញ។ ម្យ៉ាងទៀត កម្លាំងរុញ ឈាមរបស់បេះដូងក្នុងសរសៃវ៉ែនមានឥទ្ធិពលតិចជាងនៅក្នុងសរសៃអាកទែ។
• សរសៃប្ដូរ : មានការបណ្ដូររូបធាតុផ្សេងៗរវាង ឈាម និងកោសិកានៃសារពាង្គកាយ។ ភ្នាស សរសៃប្ដូរបង្កឡើងពីកោសិកាក្រាស់តែមួយ ស្រទាប់។ ភ្នាសសរសៃប្ដូរអាចឱ្យ អុកស៊ីសែន និងស្ករឆ្លងកាត់ពីឈាមទៅកោសិកា។ កាក សំណល់កោសិកា ធ្វើដំណើរតាមទិសដៅផ្ទុយ គឺចេញពីកោសិកាចូលទៅក្នុងឈាមតាមភ្នាសសរសៃប្ដូរ។ បណ្ដាញសរសៃប្ដូរភ្ជាប់អាកទែទៅ នឹងវ៉ែន។ សរសៃប្ដូរភាគច្រើនតូចៗ ដូចនេះ កោសិកាឈាមត្រូវតែឆ្លងកាត់ជាជួរ។