ចំពោះជនសង្ស័យថាមានកំហុស គេត្រូវអនុវត្តជននោះដូចជា ៖ ត្រូវឱ្យជនសង្ស័យលូកដៃយកពងមាន់ឬ ចិញ្ចៀនក្នុងទឹកកំពុងពុះ ប្រសិនបើមិនរលាកដៃជននោះត្រូវរួចទោស។

សាសនាដែលព្រះរាជា និងប្រជារាស្រ្តគោរពនៅក្នុងអាណាចក្រភ្នំគឺ ៖
• ព្រះរាជា និងនាម៉ឺនមន្ត្រី គោរពសាសនាព្រាហ្មណ៍គណៈឥសូរ វិស្ណុ និងហរិហរៈ។
• ប្រជារាស្ត្រគោរពព្រះពុទ្ធសាសនា គោរពដូនតា បុព្វបុរស និងអារុក្ខអារក្សអ្នកតា។

ប្រជាជននគរភ្នំរស់នៅប្រមូលផ្តុំគ្នាជាភូមិមានផ្ទះពី៥០ទៅ៦០ខ្នង សង់ផុតពីដី មានស្រះទឹកមួយប្រើរួមគ្នា អ្នកស្រុកនគរភ្នំមាន សម្បុរខ្មៅស្រអែម កម្ពស់១.៦២ម៉ែត្រ សក់រួញអង្គាដី ពាក់ក្រវិលទាំងប្រុសទាំងស្រី ស្លៀកសំពត់ចងក្បិន លែងខ្លួនទទេ(ប្រុស) ស្លៀកចោមពុង(ស្រី) រីឯព្រះរាជាគង់ក្នុងវាំងសង់ពីឈើពីរជាន់។

មូលហេតុ ដែលនាំឱ្យអាណាចក្រភ្នំដួលរលំគឺ ៖
• វិបត្តិគ្រោះទឹកជំនន់យ៉ាងធំនៅស.តទី៦នាំឱ្យប្រជាជនភៀសខ្លួនទៅរស់នៅភាគខាងជើង(ចេនឡា)លែងមករស់នៅភាគខាងត្បូងវិញ។
• ជម្លោះសាសនាអ្នកស្រុកចេនឡាត្រកូលសូរ្យវង្ស(វង្សព្រះអាទិត្យ)បានបង្ខំអ្នកស្រុកនគរភ្នំត្រកូលសោមវង្ស(វង្សព្រះចន្ទ)គោរពសាសនាដូចពួកគេដែរ។
• ការមិនពេញចិត្តនឹងព្រះបាទរុទ្រវរ្ម័នដែលសម្លាប់គុណវរ្ម័នបានធ្វើការបះបោរប្រឆាំងនាំឱ្យអាណាចក្រភ្នំដួលរលំ។
• ការសងសឹករបស់ព្រះបាទភវវរ្ម័ន(ចៅព្រះបាទ រុទ្រវរ្ម័ន)បានបង្ក្រាបចលនាបះបោរបានវាយអាណាចក្រភ្នំដាក់បញ្ចូលជាមួយចេនឡាហើយបង្កើតជាអាណាចក្រចេនឡានៅសតវត្សទី៦។